Bi êrîşa çeteyên Heyat Tehrîr El Şam (HTŞ) ên ku bermahiyên El Qaîdeyê di 27’ê Mijdara 2024’an de li ser Helebê, dewleta Tirk a dagirker dest bi liv û tevgerê kir. Tê zanîn ku dewleta Tirk bi destê çeteyên DAIŞ’ê hewl dide hebûna xwe li herêmê daîmî bike û serweriya xwe li seranserê Sûriyê xurt bike. Niha jî hat zanîn ku MÎT’ê çeteyên DAIŞ’ê ber bi çola Sûriyê ve guhastine.
Li gorî agahiyên ku me wekî Lekolin.org bi dest xistine, piştî ku Dewletên Yekbuyî ya Emerîkayê (DYE) zextên xwe li ser desthilatdariya HTŞ’ê zêde kir ji bo ku çeteyên biyanî ji Sûriyê bên derxistin, MÎT di 28’ê Nîsana 2025’an de kete tevgerê û şûna çeteyên girêdayê xwe ji heremê derbixe, di ser de endamên DAIŞ’ê yên ji Tirkiye û welatên derve bi riya îstîxbarata HTŞ’ê zêde kir. MÎT’ê çeteyên DAIŞ’ê yên bi eslê xwe ji Tirkiyê û biyanî ne, yên li bakurê Sûriyê bûn, ber bi çolistana Sûriyê ve şandin.
Tê zanîn ku piraniya endamên çeteyên DAIŞ’ê yên ku ber bi çolistana Sûriyê ve hatine şandin, hem li welatên wan hem jî ji aliyê dewlet û saziyên navneteweyî ve di lîsteya kesên hatine xwestin de di rêza pêş de ne. Hat diyarkirin ku MÎT’ê berî her tiştî van çeteyan li kampên perwerdeyê yên li Hatayê perwerde kirine, perspektîf û talîmat dane wan û piştre bi rêya komeke ku ji aliyê îstîxbarata HTŞ’ê ve hatibû erkdarkirin, bi komên biçûk ber bi herêmên ku jê re çolistana Sûriyê tê gotin ve şandine.
Ji nava van sedan çeteyên DAIŞ’ê yên ji Tirkiye û Bakurê Kurdistan, Tirkmenistan, Azerbaycan, Uygur, Çeçenistan, Îngiltere, Elmanya û Fransayê ne, hin navên wan me bidest xistî wiha ne;
“Burak Hazar (Tirkmenistan), Nusret Yilmaz (Azerbaycan), Hasan Aydin (Tirkiye-Adana), İsmet Eltin, Muhammed Coş (Tirkiye), Muhyettin Bozik Yankoz (Tirkiye-Konya), Mustafa Tokmacı (Tirkiye-Adana), Talip Akkurt (Tirkiye-Entab), Bayram Yildiz (Tirkiye-Adana), Cihan Durmaz, Hacı Yusuf Kızılbay (Tirkiye-Adiyeman), Hasan Hüseyin Yogurtçu (Tirkiye-Entab), Mahmut Hadi Dündar (Tirkiye-Ediyeman), Metin Çevik (Tirkiye-Entab), Muhammed Zana (Tirkiye-Ediyeman), Resul Akin, Abdulkadir Erkan, Mustafa Demir (Tirkiye-Hatay), Bayram Çitfçi (Tirkiye-Batman), Hasan Kara (Tirkiye-Aksaray), Muhammed Bekir (Tirkiye-Konya), Omer Aydemir (Tirkiye-Amed).”
KOMEK ÇETEYÊN KU JI ZINDANA EL RAÎ HATIBUN REVANDIN JÎ HATIN DERBASKIRIN
Malpera me Lekolin.org di nûçeya taybet a 26’ê Adara 2025’an de eşkere kiribû ku MÎT’ê bi rêya serçeteyekî bi navê Xedfan, ku li qadê hatiye erkdarkirin, di bin navê reviyane de gelek çeteyên DAIŞ’ê serbest berdane.
Li gorî agahiyên ku me bi dest xistine, çeteyên DAIŞ’ê yên Iraqî ku li herêma Efrînê hatibûn bicîhkirin, ji aliyê MÎT’ê ve ber bi çolistana Sûriyê ve hatin veguhastin. Navên koma çeteyên 6 kesî yên ku ber bi çola Sûriyê ve hatin şandin wiha ne:
-Xidir Mihemed El Lihêbî, ji Iraqê ye.
-Salim El Hemdan, ji Sûriyê ye.
-Sêf Xelîl El Kerbûlî, ji Iraqê ye.
-Welîd Casim El Qeysî, ji Iraqê ye.
-Mistefa Hemed El Cêsî, ji Sûriyê ye.
-Ûqab Şêx El Selmanî, ji Iraqê ye.
SERÊ SALÊ ODEYÊN OPERASYONÊ HATIN AVAKIRIN
Malpera me Lekolin.org di nûçeya taybet a 18’ê Sibata 2025’an de ragihandibû ku dewleta Tirk a dagirker ji bo planên xwe yên qirêj li herêmên ku piraniya wan Ereb dijîn bixe pratîkê, li herêma Dêrazorê odeyên operasyonê ava kirine.
Di van odeyên operasyonê de, komên girêdayî Meclisa Leşkerî ya Dêrazorê hatin şopandin, li ser şervanên QSD’ê û herêmên ku ew lê ne agahiyên îstîxbaratî hatin komkirin û êrîşên sûîqest û sabotajê hatin plankirin.
Ji destpêka sala 2025’an ve, bi taybetî li Dêrazorê û herêmên di bin kontrola QSD’ê de, çeteyên DAIŞ’ê 82 êrîş pêk anîne. Piştî ku MÎT’ê çeteyên nû yên DAIŞ’ê ber bi herêmên çolistana Sûriyê ve veguhast, ev êrîş hê zêdetir bûne.
