Dewleta Tirk a dagirker ku di êrîşen xwe yên li ser Qadên Parastina Medyayê de tu encamên ku dixwaze negirt, bi 3’ê tîrmehê û şûn ve plana îlhaqkirinê xist meriyetê. PDK a ku ji roja destpêka êrîşên dewleta Tirk a dagirker hemû cure piştgiriyê dide wê, di çerçoveya plana hevpar a MÎT û Parastinê de li qadên gerîlayan cîhazên GPS bi cih dikin.
Li gor agahiyên me bidestxistiye, Parastin a ku bi perspektîfa MÎT’ê ketiye tevgerê zêdetirê 500 qart û cîhazên GPS’ê radestê qaşo fermandarê Foca Şeş a Çeteyên Roj Ehmed Heso kiriye. Hat ragihandin ku Parastin talîmat daye Ehmed Heso ku van qart û cîhazên GPS’ê bi riya şaneyên sîxûrên xwe li heremên Bamişmiş û Bagirmanê ya girêdayê navçeya Akrê ya Duhokê bi cih bike.
Li ser vê yekî çeteyê Roj Ehmed Heso van qartên GPS’ê bi riya tora sîxûrên xwe bi motorsîkletan derbasî van her du xetan kiriye û di nava dar û kevirên heremê de bi cih kirine.
Ehmed Heso ku bi eslê xwe ji navçeya Amûdê ya Qamişlo Rojavayê Kurdistanê ye qaşo fermandariya Foca 6’emîn a nava çeteyên Roj dike.
DI NAVA KEL Û PELÊN LOJÎSTÎKÊ DE JÎ GPS HATINE BICIHKIRIN
Parastin ku berê bi talîmata MÎT’ê dest danîbû ser maskeyên xazê yên ji gerîlayan re dihatin şandin, niha jî dest datîne ser kel û pelên lojîstîkê û hevkariya xwe ya bi dewleta Tirk a dagirker û qirker re derxist asta herî jor.
Li gor agahiyan Parastin a ku dest datîne ser kel û pelên lojîstîkê yên ji gerîlayên azadiyê re tên şandin, di nava van amûran de qartên GPS bi cih dike û bi riya mixtarên heremê re dişînin qadên gerîlayan.
Berê malpera me Lekolîn.org bi weşandina nûçeyek taybet dewleta Tirk a dagirker ji bo bingeha plana îlhaqkirinê ava bike mixtarên herêma Berwarî ji bo bike sîxûrên xwe civînan çêkiriye, deşifre kiribû.
BERÊ JÎ BI TALÎMATÊN MÎT’Ê FOTOKAPAN HATIBÛN DANÎN
Bi taybet di nava 3 salên dawî de hezên taybet ên girêdayên PDK a ku agahiyên derbarê guzergahên yekîneyên gerîlayan dida dewleta Tirk a dagirker, li ser van guzergehan fotokapan hatibûn bicihkirin û agahiyên wan rasterast ji Navenda Odeya Hevpar a MÎT û Parastinê re dihatin şandin. Di encama van agahiyan de ji aliyê hêzên taybet ên PDK’ê û artêşa dewleta Tirk a dagirker kemîn datanîn ser riya van çûn û hatina gerîlayan û êrîşan pêk tanîn.
AMADEKARIYA ÊRÎŞEKE NÛ
Dewleta Tirk a dagirker ku di Qada Parastina Medyayê de asê maye û nikariye bigihêje armanca xwe ya heyanî havînê her der bixe bin kontrola xwe, bi erêkirina hikumeta Iraqê re û bi hevkariya PDK’ê re di nav amadekariya êrîşeke nû ya li ser heremên Şeladizê, Amediyê, Bagirmanê û Bamişmişê bike de ye.
Li gor agahiyan Parastin di vê çerçoveyê de sîxûrê hevpar a bi nasnav Şehreza tê naskirin û heremê baş nas dike erkdar kiriye. Tê gotin ku sîxûrê bi nasnav Şehreza di êrîşên dagirkeriyê ya dewleta Tirk a dagirker a li ser Efrînê de rolek aktîf leyistiye. Her wiha tê gotin ku Şehreza ji çeteyên Tirkmen ên bi armaya şîn anîne heremê re jî pêşengtiyê dike.
