Dengê me di vegotina kesayet, bawerî, raman û hestên me de amûra herî bi bador e. Dengê me ne tiştek ji rêzê û vala ye. Dengê me, daxwaz, hêvî û baweriyên me vedibêje di hilbijartinan de. Lewma divê em bizanin em dengê xwe didin çi û bersiva dengê me li me çawa vedigere.
Em di serdemekî naverok bi pir têgînan hatî valakirin, berovajîkirin de dijîn. Hîma bingehîn a hişmendiya vê serdema me xwe dispêre desthilatî û îxtîdarê. Lê piraniya desthilatdariyên tên ser îxtîdarê herî zêde peyva demokrasiyê bi kar tînin. Wekî çespandina demokratîkbûna xwe jî hilbijartinan nîşan didin û di encama hilbijartinan de dengên digirin wekî rewa nîşandana hemû siyaset, polîtîka û kiryarên xwe dibînin û kiryarên xwe bi dengê me derdixin paqijiyê.
Lê gelo em dengê xwe didin çi, li rastî çi tên? An divê em dengê xwe nedin çi? Ger em dengê xwe nedin tiştên em naxwazin, em ê bêdengiyê bibijêrin. Nexêr!
Wê demê ez dengê xwe nadin kuştina xwe. Bi dengê xwe kuştina xwe erê nakim û kiryarên kujerê xwe di bin navê dengan û hilbijartinan de rewa nadim nîşan.
Ez dengê xwe nadim ên haşayiyê li hebûna min a dîrokî, civakî, çandî û fizîkî tînin. Ez dengê xwe nadim ên welat, ax, demborî, ziman û çanda min tine dihesibînin. Min naxin cihê mirovan û li hember hemû mafên min ên mirovî zilm, zor û înkarê pêk tînin.
Ez dengê xwe nadim ên bi dev dibêjin em birane û ji bo tinebûna min hemû xaka min dagir dikin. Min dikujin, bi termê min dilîzin, goristanên gora min di nav de xira dikin, nahêlin ez termê kuştiyên xwe ji kolanan rakim û bi rojan her awayê bêrêziyê li hemberî hemû pîroziyên min dikin. Ez deng nadim ên zarokên min ên mîna Ceylan, Oxur Kaymaz û Mihemed di temenê bihara wan de bi tang û topên ku bi baca ji min girtin û kuştina wan wekî egera heyîna xwe, kujerên wan leheng û qehreman dibînin.
Ez deng nadim ên hizir û ramanên min qedexe û xeter dibînin, ji bo wê min digirin, di girtîgehan de êşkence dikin, bi beden, rûmet û xîreta min dilîzin û dixwazin ez haşayiyê li xwe bînim. Ez deng nadim ên ku ji derveyî haşayî li xwe anînê ti mafê jiyanê nadin min, jiyanê hemûyê li min dikin girtîgeh, di wan girtîgehan de dixwazin hemû hebûna min birizînin.
Ez deng nadim ên li ser vê cîhana ku têra jiyankirina her zindî dike mafên min ên jiyankirinê ji dest min digirin. Xaka min dagir dikin, gund û zozanên min vala dikin, tax û bajarên min didin ber tang û topan, li kolanan pêl li termên zarokên min dikin. Ên min neçarî penaberî û derberderiyê dikin, ji cih û warê min derdixin, min feqîr û hejar dikin, dixwazin min bi birçîbûnê terbiye bikin û radest bigirin.
Ez dengê xwe nadim ên zimanê min tine dihesibînin. Ji ber axaftina bi zimanê min, gotina stran û awazekî bi zimanê min, li xwekirin û berkirina cil û bergek ji ra û rîşên çanda min ji derveyî girtin û kuştinê ti mafên din layîqî min nabînin. Deng nadim yên min mîna lawirekî bi kevilê xwe digere, bi zimanê xwe daxive jî nabînin.
Deng nadim ên wekî jinekê kuştina min, tecawîzkirina min, destdirêjiya li ser beden, hest, raman û heyîna min dirêjkirinê mafên xwe dibînin, yên van kiryaran dikin xelat dikin û binpêkirina xîret û kerameta hebûna min bi gotinên “tewşî fitratê ye” erê dikin û berê kujer û tecawîzkaran didin min.
Deng nadim ên min bêhêvî dihêlin, xwe dixin şûna çavkaniya hebûna min û kuştina min a bi her awayî ji xwe re rewa dibînin. Deng nadim ên bêrêziyê li hemberî baweriya min dikin û êrişî hemû nirxên min ên manewî dikin. Deng nadim ên berê min ji roj û ronahiyê vedigerînin tariyê, deriyên pêşerojên azad û xweş ên di xeyalên min de digirin û dixwazin min fêrî bindestî û benîtiyê bikin. Ji van hemûyan re dibêjim NA! Ez ê bi dengê xwe çi tiştên hûn dikin erê nekim, qirêjî, zordestî, bêmafî û faşîzma we erê nekim. Lê ez bêdeng jî namînim.
Ji ber dengê min vîn û rûmeta min e. Dengê min çeka xwe vegotina min e. Dengê min rêzdarî û hezkirina min a li hember hebûna min e. Dengê min ez im, ez xwe nadim dizîn, xwe nafiroşim, xwe nakim kole, xwe nadim destên min ji minbûnê dûr dixin û hemû heyîna xwe li ser tinebûna min didin rûnişkandin.
Ez ê dengê xwe bidim ên min mirov dibînin. Wekî her mirovî hebûna welatê min, dîroka min, civaka min, çanda min, zimanê min, azadiya min, vîn û baweriya min egera jiyan û têkoşîna xwe dibînin. Ez ê dengê xwe bidim ên ji bo bi van nirxên mirovan dikin mirov dixwazin hundirê têgîna demokrasiyê dagirin û hatina girtin, kuştin, derbederkirinê digirin ber çav. Ji bo azadî, demokrasî, wekheviya mirovan têdikoşin û ji bona vê berdêl didin wekî min. Bi kurtasî, ez ê dengê xwe bidim xwe.
