07 Mayıs 2011 Cumartesi Saat 17:55
Dayîkên Şemiyê di 319’emîn çalakiya xwe de diyar kirin ku ji ben ku “bersivê nadin lêgerîna wan a edaletê” û “gorên ku ew gulan daynîn nîn in” Roja Dayîkan pîroz nakin. Dayîkan ji ber ku êdî gotin nemaye bi 5 deqîqe çalakiya rûniştinê dest bi çalakiya xwe ya vê hefteyê kirin.
Sibehê Roja Dayîkan e lê ew ne kulîlkan zarokên xwe yên ku hatine windakirin dixwazin. Dayîkên Şemiyê yên ku ji bo zarok û xizmên xwe yên ku hatine windakirin bên dîtin û hebas bê pirsîn bi salan e li ber Lîseya Galatasarayê qêrînên xwe didominîn. Dayîkên Şemiyê di hefteya 319’emîn de jî çalakiya xwe li dar xistin. Dayîkên ku pankarta “kiryar diyar in lê winda li kû ne” û wêneyên windayan rakirin careke din dê Roja Dayîkan bi xemgînî pîroz bikin. Dayîkan beriya çalakiyê anîn ziman ku “sibehê Roja Dayîkan e û êdî gotina ku em bikin jî nemaye” û 5 deqîqe çalakiya rûniştinê pêk anîn û piştre jî dest bi çalakiya vê hefteyê kirin. Dayîkan dilar kirin ku ev 16 sal in bersivê nadin lêgerînên wan û ji ber ku goreke ku kulîlkan daynin nîn e ewê Roja Dayîkan pîroz nekin. Piştî çalakiya rûniştinê li ser navê dayîkan Songul Oktar axivî û got ku ji ber Roja Dayîkan dê rayedar sibehê jî qala pîrozbûna dayîkan bikin lê ew ê daxwazên dayîkên ku ev 16 sal in aqûbeta zarokên xwe dipirsin nebînin. Otar wiha got: “16 sal in em li vê derê ji ber ku guh nadin daxwazên me, aqûbeta zarok û xizmên me yên ku hatine windakirin nayê ronîkirin, ji ber ku goreke ku em kulîlkan daynîn nîn e, ji ber edalet bi cih nayê em ê Roja Dayîkan pîroz nekin.”
Piştî Oktar, kurê keyayê gundê Akçayurtê ya Henê ya Amedê Mustafa Mehmet Gunkan ê ku di 18’ê tebaxa 1994’an de hate binçavkirin û piştre jî hate windakirin Mehmet Alî Gunkan çiroka windakirina bavê xwe vegot. Gunkan got ku di 13’ê hezîrena 1994’an de li gundê wan pevçûn qewimiye û gund ji aliyê leşkeran ve hatiye şewitandin, piştre jî cendirmeyan hemû gundî le qada gund kom kirine û heqeret li wan kirine û piştre jî bavê wî bin çav kirine. Gunkan anî ziman ku bavê wî piştî hefteyeke tê berdan û careke din ji aliyê hevsarê bi navê Hakan ê li Qereqola Cendirmeyan a Topçularê ve hatiye binçavkirin. Gunkan wiha berdewam kir: “Bavê min piştî ku tê binçavkirin û wî dibin qereqolê li ber çavên hemû gundiyan ve wî li helîkopterê tê siwarkirin. Wî dibin ciheke din. Piştre jî êdi min bavê xwe nedît. Her tiştê hevsarê bi navê Hakan dizane.”
Gunkan da zanîn ku piştî ku bavê wî hat windakirin wan serî li Serokomar, Wezareta Karên Hundir û gelek cihan daye lê li gel vê yekê jî tu bersiv negirtine. Gunkan destnîşan kir ku bersiva “bavê we nehat binçavkirin, tenê qazê qereqolê kirin û piştî nîv saetan hate berdan” didin wan. Gunkan bilêv kir ku ew baş dizanin mu bavê wî hatiye kuştin ji ber ku her tişt ber çavên wan qewimî ye. Gunkan di dawiya axaftina xwe de got ku dewlet weke bi hezaran kesên ku di bin çavan de hatine windakirin ji hesabdayînê ditirse.
Piştî axaftinan dayîkan çalakiya xwe bi dawî kirin.
Navenda Lêkolînên Stratejîk a Kurdistanê
www.navendalekolin.com www.lekolin.org -www.lekolin.net – www.lekolin.info
