Serokê Partiya Demokrata Kurdistanê (PDK) Mesûd Barzanî di 29‘ê Cotmehê de li ofîsa partiya xwe ya li Hewlêrê 8 serçeteyên girêdayên dewleta Tirk a dagirker ku di dagirkirina Efrîn, Girê Spî û Serêkaniyê de roleke mezin lîstin, di bin navê Desteya Dan û Standina Muxalefeta Sûriyê de hevdîtin pêk anî. Piştre bi heman serçete, nûnerên partiya AKP-MHP’ê, ENKS, Eniya Tirkmenên Iraqê yên girêdayê MHP’ê ne, beşdarî merasîma pîrozbahiya 101’emîn salvegera Komara Tirkiyeyê ya ku li ser polîtîkaya qirkirinê ya li ser Kurdan hatiye avakirin bûn.
Ev wêne û dîmen ku bertekeke mezin di nav gelê Kurd de çêkir, bi taybetî jî hevdîtina serkirdeyên komên çete yên bi Barzanî re û xuyabûna wan bi van serkirdeyên çeteyan re di salvegera damezrandina komarê de ku 101 sal in li ser qirkirina Kurdan hatiye avakirin, çavên her kesî zivirand ser binpêkirinên mafan, revandin, talankirin, komkujî û destdirêjiya bi taybet a li Efrîn û Serêkaniyê tên kirin.
DI HEVDÎTINA BARZANÎ DE TECAWIZKAR Û ÎŞKENCEKAR EHMED OSMAN JÎ HEBÛ!
Yek ji wan kesên ku ji aliyê Barzanî û endamên ENKSê ve bi coşeke mezin hat pêşwazîkirin yek ji damezrînerên koma çete ya Emşat û serkirdeyên koma Sultan Murat, Ehmed Osman ê ku di Efrînê de wek e tecawizkar û îşkencekar tên naskirin jî hebû. Piştî dagirkirina Efrînê Ehmed Osman yekser li ser navê koma çete ya Emşat talimat da çeteyan ku li navenda bajar, navçe û gundewarên Efrînê hemû malbat û kesên nêzî Tevgera Azadiya Kurd werin tesbîtkirin. Di destpêka sala 2019’an de bi sedan kes ku di nava wan de jin û zarok jî hebûn hatin revandin, hatin îşkencekirin û li beranberê berdana wan fidye hatin xwestin. Hate diyarkirin ku di nava van jinên ku di vê pêvajoyê de hatin revandin de, xwişkên X.R.M (24) û Z.E (27) bi hinceta ku birayên wan endamên YPG’ê ne, birine cihê taybet a Ehmed Osman û ji aliyê serçete Ehmed Osman bi xwe ve rastî tecawizê hatine.
Hate hînbûn ku Selah Xelîl Menle yê ku tê diyarkirin xizmê her du jinan e, ji vê rewşê agahdar bûne, daxwaza berdana jinan ji nûnerên MÎT’ê û komên çete kiriye. Piştî 3 rojan 2 jinên rastî tecawizê ya ji aliyê serçete Ehmed Osman ve hatine li ser riya navbera Efrîn û Cindirêsê de kûştî hatine dîtin. Di nava agahiyên ku hatine bidestxistin de rêveberê herêmê yê MÎT’ê yê wê demê bi navê Samî ji bo bûyera destavêtinê neyê bihîstin fermana qetilkirina du xwişkan daye.
Li şûna ku Ehmed Osman ji ber vê bûyerê bê cezakirin, bi hinceta ku dijminê herî hov ê Kurdan e, ji aliyê MÎT’ê ve ew xelat kirin û derxistin asta jor a heya weke berpirsyarê koma çete ya Lîwaya Sultan Murad.
Ehmed Osman û ekîba wî ya çete ne tenê li pişt revandin, kuştin, fîdyeyê, di heman demê de li pişt hemû talankirina Efrînê û piştre li Serêkaniyê, wêrankirin û rakirina berhemên dîrokî û firotina wan li derveyî welat û Sûriyê û projeyên guhertina demografîk e. Li gorî daneyên Rêxistina Mafên Mirovan a Efrînê; tenê di nava 5 salan de (2018-2023) 99 jin ji aliyê çeteyan ve hatin qetilkirin û 74 jin jî rastî destavêtinê (tecawizê) hatin.
Ji bo kesên ku li ser bîlançoya hemû binpêkirinên mafên mirovan ên koma çete ya Firqeya Sultan Murad li Efrîn, Serêkaniyê û Girê Spî meraq dikin, dikarin di motora lêgerînê de tenê navên rêxistinên wek e Rêxistina Mafên Mirovan a Efrînê û Çavdêriya Mafên Mirovan a Sûriyeyê binivsînin bes e.
Fırat ALİ
Navenda Lêkolînên Stratejîk A Kurdistanê
