Di demên dawî de Wezîrê Karên Derve yê Tirkiyê Hakan Fidan û serokê hikûmeta demkî ya Şamê Colanî bi gefên li ser QSD’ê Rojava dikin armanc. Hat zanîn ku Dewleta Tirk ku ji sê eniyan amadekariya êrîşê dike, bi destê MÎT û îstîxbarata HTŞ’ê piştgiriya DAIŞ’ê ya li ser xeta Dêrazorê zêde kiriye.
Wekî ku tê zanîn, di mehên borî de piştî ku zextên DYA’yê li ser desthilata HTŞ’ê ji bo derxistina çeteyên biyanî yên li Sûriyê zêde bûn, MÎT ketibû nav tevgerê. Malpera me Lekolin.org di nûçeyeke xwe ya taybet de eşkere kiribû ku çeteyên DAIŞ’ê yên bi eslê xwe ji Tirkiyê û biyanî yên li Bakurê Sûriyê ne, ber bi çola Sûriyê ve hatine veguhestin û navên wan jî hatine eşkerekirin.
Di nûçeyê de hate gotin ku piraniya çeteyên DAIŞ’ê yên ber bi çolistana Sûriyê ve hatine veguhestin, hem li welatên wan hem jî ji aliyê dewlet û saziyên navneteweyî ve di nav lîsteya kesên têne xwestin de ne. Piştî ku ji aliyê MÎT’ê ve li kampên perwerdeyê yên li Hatayê perspektîf û talîmatên pêwîst hatine dayîn, komek ji aliyê îstîxbarata HTŞ’ê ve hatiye erkdarkirin û bi komên biçûk ber bi herêmên çola Sûriyê (bi taybetî Dêrazor) ve hatine şandin.
VEGUHESTINA EMİRÊN DAIŞ’Ê BO DÊRAZORÊ Û ROLA EBÛ HATIM ŞAKRA
Li gorî agahiyên ku ji çavkaniyên pêbawer hatine bidestxistin, di 15’ê Îlona 2025’an de, MÎT’ê erkê veguhestina çeteyên DAIŞ’ê û emîrên wan ên li qadê hatine komkirin bo gundewarên Dêrazorê, spartiye îstîxbarata HTŞ’ê.
Îstîxbarata HTŞ’ê jî di vê çarçoveyê de Hêzên Ewlekariya Giştî erkdar kiriye ku çeteyên DAIŞ’ê yên Sûrî û serokên DAIŞ’ê yên Iraqî ber bi Dêrazor û El Meyadînê ve bibin. Berpirsiyarê vê planê Ebû Hatim El Şeqra ye ku weke Ahmed Îhsan Fiyad El Hiyas tê naskirin û mirovekî MÎT’ê yê li qadê ye. Şakra bi erka bilezandina organîzekirina eşîrên Erebî hatiye erkdarkirin û di vê pêvajoyê de ji bo ku eşîrên herêmî yên li Dêrazorê bi DAIŞ’ê re li dijî QSD’ê roleke stratejîk bilîzin, xebatan dimeşîne.
Malpera me Lekolin.org di nûçeya xwe ya taybet a 23’ê Tebaxa 2025’an de eşkere kiribû ku Ebû Hatim El Şeqra, ku bi salan ji aliyê MÎT’ê ve hatiye perwerdekirin û di gelek tawanên şer de hatiye bikaranîn, çeteyên DAIŞ’ê yên ku kom kirine bi navê “Hêza Eşîran” li dijî QSD’ê ji bo şer amade dike.
Navên serokên DAIŞ’ê yên ku ber bi herêma Dêrazor û El Meyadînê ve hatine veguhestin wiha ne:
-Farîs Mi0hemed Nûrqadir, Ebû Enes: Di navbera 2014-2016’an de li Mûsilê bû. Di navbera 2016-2017’an de li Dêrazor û Reqqayê bû.
-Mihemed Qadir Sarhan Ziyab El Rawî, Ebû Merwan: Di navbera 2014-2016’an de li Mûsil-Telafarê bû. Di navbera 2016-2017’an de li Dêrazor û Reqqayê bû.
-Ehmed Talip: Di navbera 2014-2016’an de li herêmên Seleheddîn û Enbarê yên Iraqê bû. Di navbera 2016-2017’an de li Dêrazor û Reqqayê bû.
-Osama Mihemed Xelef Dehhal, Ebû Aîşe: Di navbera 2014-2016’an de li Mûsilê bû. Di navbera 2016-2017’an de li Dêrazor û Reqqayê bû.
Di çarçoveya talîmatên MÎT’ê de, dema îstîxbarata HTŞ’ê çete û serokên DAIŞ’ê ber bi herêmên Dêrazor û El Meyadînê ve diguhezîne, çeteyên DAIŞ’ê yên li gundewarên Helebê jî ji bo tevgerekê hatine komkirin.
CIVÎNA MÎT-DAIŞ’Ê LI GUNDEWARÊN HELEBÊ
Li gorî agahiyên ku ji çavkaniyên pêbawer hatine bidestxistin, bi pêşengiya MÎT’ê, serokên pilebilind ên DAIŞ’ê di 17’ê Îlonê de li gundewarên Helebê civîneke veşartî li dar xistine. Di civînê de navên weke Ebû Hesen El Iraqî û El Betar El Iraqî yên ji Iraqê û Ebû Osman El Cezrawî yê ji Dêrazorê cih girtine, ev yek hate zanîn. Di civînê de ku ji aliyê rayedarên MÎT’ê yên li qadê ve hate birêvebirin, talîmat ji komên ewlekariyê yên taybet ên di bin banê HTŞ’ê de hatine avakirin û hucreyên DAIŞ’ê re hatine dayîn ku mînan bi cih bikin û êrîşên leşkerî li dijî nuqteyên kontrolê yên QSD’ê pêk bînin.
Pêdeçûna planê êrîşê jî wiha ye:
-Li gundewarên rojhilatê Dêrazorê, li herêma Bisêra, Ebû El Berae erkdar e ku çalakiyên DAIŞ’ê li qadê koordîne bike.
-Di çarçoveya talîmatên MÎT’ê de, agahî hene ku DAIŞ’ê ji bo êrîşên li gundewarên rojava û rojhilatê Dêrazorê, di komên pênc kesî de hatiye dabeşkirin. Di her komê de serokekî çete yê pispor di sabotajê de heye.
-Ev talîmatên ku MÎT’ê piştî operasyona dawî ya Hêzên Ewlekariya Hundirîn a Rojava li Kampa Holê hatine dayîn, balkêş e. MÎT armanc dike ku DAIŞ ne tenê li Dêrazorê, lê li gundewarên Reqqayê û Kesratê jî bi destê DAIŞ’ê êrîşên xwe zêde bike.
Bi piştgiriya dewleta Tirk, eşkere xuya dike ku DAIŞ di sala 2024’an de piştî guhertina rejîmê, ji rewşa kaotîk a li Sûriyê sûd wergirt û hewl dide ji nû ve xwe bi rêxistin bike. Bi taybetî li Dêrazorê û çola Sûriyê, li gorî salên berê gelekî bi rêxistin bûye.
Dewleta Tirk, bi paralêlî hewldanên destpêkirina şerekî li Bakur û Rojhilatê Sûriyê, hucreyên DAIŞ’ê dixe nav tevgerê. Ev strateji, armanc dike ku ewlekariya herêmê têk bibe û QSD’ê hem li eniyan hem jî li navçeyên hundirîn têk bibe. Ev rewş nîşan dide ku Dêrazor wê hem ji bo DAIŞ’ê hem jî ji bo hêzên herêmî weke navendeke şer berdewam bike.
QSD: BI HATINA HTŞ’Ê ÊRÎŞÊN DAIŞ’Ê ZÊDE BÛN
Berdevkê Hêzên Sûriya Demokratîk (QSD) Ebcer Dawûd diyar kir ku ji sala borî ve li dijî DAIŞ’ê 70 operasyon pêk anîne, lê bi hatina HTŞ’ê êrîşên DAIŞ’ê zêde bûne.
Ebcer Dawûd, di daxuyaniya xwe ya li Hesekê de, li ser êrîşên DAIŞ’ê yên di navbera 8’ê Kanûna 2024’an û 20’ê Îlona 2025’an de û operasyonên hatine kirin bilançoyek parve kir.
Li gorî agahiyan, di vê demê de DAIŞ’ê li Rojava bi giştî 153 êrîş pêk anîne. Di van êrîşan de 6 sivîl û 30 şervanên QSD’ê jiyana xwe ji dest dane, 12 şervan jî birîndar bûne.
Li gorî agahiyên Ebcer Dawûd, QSD’ê di 10 mehên dawî de li hemberî van êrîşan 70 operasyon pêk anîne. Di van operasyonan de, 95 çeteyên DAIŞ’ê, di nav de serokên wan, hatine girtin, 6 çete jî hatine kuştin. Di operasyonan de gelek çek û cebilxane jî hatine desteserkirin.
Militan RÊHAT
