Li ser Wezareta Karê Hûndir a Tirkiyê ku hemû saziyên polîs, jenderme, ewlekariya behre û notirvan (bekçî) girêdayî wê ne û ji aliyê Artêşa Tirk ve bi çekên giran tê parastin ji aliyê du gerîlayên cangorî di 1’ê cotmehê de çalakiyeke fedayî pêkanîn. Fermandariya Biryargeha Navenda HPG’ê aşkere kir ku vê çalakiyê “Tabûra Nemiran” pêkanîne. Li gor vê daxuyaniyê, tê diyarkirin ku ev çalakî bersiveke li dijî êrîşên dewleta Tirk a dagirker ên neheq û ji bê exleqiyê para xwe negirtine û hemû jî êrîşên sûcê şer ên li ser HPG’ê, girtiyên zindanan, bi giştî gelê Kurd tên meşandine, her wiha ev çalakî hişyariyek ji bo dewleta Tirk a dagirker e. Biryargeha HPG’ê destnîşan dike ku eger wan xwestibûya dikaribûn di seatên ku herî qelebalix de pêk bînin, lê serî li vê riyê nedane, çalakî ber deriyê Wezareta Karê Hûndir hatiye kirin.
Di rastiya xwe de eger ev çalakî, di dema Erdogan jî di nav de hemû wezîr, parlementer, general û dîplomatên ku ji bo temaşevan dihatin bi boneya roja vekirina meclîsa mezin a Tirkiyeyê de derbas dibûn hatibûya kirin dê encama wê ya Tirkiyeyê serûbin kiribûya. Lewra li gor Wezîrê Karê Hûndir, êrîşa li ser parlementoyê, ji ber zêde însan hebûn dê êrîşeke hêsantir bûya.
Duyemîn artêşa herî mezin a di NATO’yê de û rêxistina polîs-jenderma ya herî mezin, di nava 40 sal vê şerî de carekê jî nikaribûya gavek nêzî Biryargeha Merkezî ya HPG’ê, lê HPG bi vê çalakiyê kete ‘biryargeha dijmin’, ev jî qonaxeke nû ya vê şerî radixe ber çavan. Li gor kordînata Wezareta Karê Hûndir, li wê heremî ‘Mejiyê Dewletê’ di wir de nîşan dide. Ji Fermandariya Artêşê bigire, saziyên navendî yên MÎT’ê, ji Cendermeyan bigire heya Meclîsa Mezin a Dewleta Tirk hemû saziyên dewletê, her yek kolanek di navbêra wan de, piraniya wan jî di bin erdê de û bi hev ve girêdayî di wê heremî de bûye wek merkez. Di bin parastina hezaran polîs û leşker, her wiha endamên MÎT’ê yên di bin firotina nan, kestane û hwd de hatine kamuflekirin, bi hezaran kamerayên mobese, balafirên keşfe yên ji hewa ve tên çavderîkirin, gotin di cih de be ‘Çûk bifirin wê were dîtin” de sizmaya gerîlayan ji bo dewleta Tirk zeafeke ewlekariyê ya mezin e û ji bo gerilla jî çalakiyeke serkeftinê ya herî bêhempa ye.
EV ÇALAKÎ LI DIJÎ NAVENDA LEŞKERÎ YE NE SIVÎL E!
Li ser esasê vê çalakiyê pêwîste her welatiyên Tirk û Kurd ji hêzên desthiladarên dewleta Tirk a dagirker re bibêjin ku bê ku dirêj bibe, bê ku şer ji Kurdistanê bikeve hemû bajarên mezin ên Tirkiyeyê, bê ku qrîza aboriyê bikeve felaketekî, bê ku Tirkiye neçar bimîne li ser daxwaza NATO’yê tevlî şer ên îhtîmal li Kafkasya, Balqanan pêk were bibe, bibêjin “Vê şerî rawestîne, hûn nikaribin rawestînin jî ya Rêber Apo serbest berdin, ew dikare şer rawestîne”.
Ev çalakî, çalakiyeke li dijî navenda leşkerî ye, ne saziyên sivîl e. Lewra partî û dezgehên muxalif jî di navê de, dewlet, hêz û hevkarên dewleta Tirk a dagirker, bê ku rê bidin hev daxuyaniyên şermezarkirinê, lanetkirinê didin. Yên wek e Rûşen Çakir jî di navê de hin qaşo rewşenbîr, siyasetmedar û rojnamevanên muxalif, wan polîtîka û kiryarên tunekirin û înkara dewleta Tirk a desthiladariya wê AKP-MHP dike ku li ser Kurdan dide meşandin nabînin, çalakiyekê yekîneyeke leşkerî ya rêxistinekê li dijî karargeha leşkerî ya dijminê xwe (dewleta Tirk) hatî kirin, ji xwe di çavên desthiladariyê de xweş-beşî nîşan bidin bê ku fêm bikin çi çiye dest bi şermezarkirinê û reşkirinê kirin.
MISIR ÇI BÛYE JI TE?
Jibilî hûndirê Tirkiyê, dewletên statukoparêz ên heremê jî bê ku fêm bikin ev çalaki çi ye çi nîne dest bi şermezarkirinê kirin. Ji van yek PDK û ya din jî Misir bû. Dê hade PDK riya wê diyare, ji hevkariya dewleta Tirk a dagirker zêdetir bûye koleyê wê û adeta li dijî gerîlayên azadiyê ji bo dewleta Tirk a dagirker mayînan paqij dike “Bûye kerê teqemeniyê (mayînan)”. Lê em fêm nakin çi ji Misirê hatiye? Yanî pir ne dûr hê duh na pêr, ma ne hûn bûn ku dema dewleta Tirk leşker û çeteyên xwe şandibûn ji bo piştgiriya çeteyên Îxwanî Muslimin a di navbêra Lîbya û Misirê, we dewleta Tirk a dagirker tewanbar dikir û gef li wan dixwar? Niha çi guherî? We li ser çi lihev kiriye? Ku berî fêm bikî ku ev çalakî çewa çêbûye pêre pêre te daxuyaniya şermezarkirinê da…
ARMANCA DAXUYANIYA HAKAN FÎDAN
Wek e her carê dikin, ev car jî ji bo hincetek ji êrîşên Bakur û Rojhilatê Sûriyê çêbike, Wezîrê Karê Derve Hakan Fîdan, dibêje ku yên çalakiya Enqereyê pêkaniye ji Sûriyê ango Rojavayê Kurdistanê derbas bûne. Ev daxuyanî aciziya hikumeta faşist a AKP-MHP’ê radixe berçavan, em wê deynin aliyekê ji bo êrîş bikî hewceyê van hincetên bêbingeh nîne. Ma Hakan Fîdan ne te digot “Ez bixwazim ji bo hincetekê êrîşê ya li ser Rojava ava bikim pir rehete, biçim aliyê din fuzeyekê bavêjim aliyê Tirkiyê temam e”. Tu jî û her kes jî baş dizane tiştek wisa ne rast e.
Welewku em bêjin wisa ye jî… Ji vê xwezayîtir çi heye? Yanî ew Rojava yê ku tu her roj bi hemû komên xwe yên çete, balafirên keşfê û bombebarkirî, hewanan êrîşê wê dike, jibilî leşkerî, endam û rêveberên sivîl ên saziyên sivîlan hedef digirî û qetil dike. Ligel vê yekî jî ev çalakî li dijî navenda leşkerî hatiye kirin, wek e çewa Biryargeha HPG’ê daxuyanî da, gerîlayên azadiyê endamên “Tabûra Nemiran” e.
PÎVANA SERKEFTINA ÇALAKIYÊ
Ev çalaki ne çalakiyekî ku çend polîs an jî leşker hatine kûştin an jî birîndarkirin e. Ev çalakî wek e me li jor anî ziman bersiveke li dijî hemû zext û zordariya li ser gelê Kurd û Kurdistanê û peyameke ji dewleta Tirk a dagirker ku digotin “PKK tenê mane çend sed kes, ew jî tê demek nêz de xilas bibin” e. Li gor vê peyamî çalakî çalakiyeke pir serkeftî bû û gihişt armanca xwe. Yanî wek rayedarên dewleta Tirk a dagirker ku dibêjin ‘bê ku bigihêjin armanca xwe hatin bêbandorkirin” an jî ew kesên pîvana serkeftin an jî binkeftina çalakiyê li gor hejmara kûştî û birîndar ên polîs û leşkeran hesab dikin, ketine bin bandora trolên tora civakî yên Erdogan, AKP-MHP’ê. Jixwe AKP-MHP ji bo rastiyê veşêre, bi riya dozgeriyê xwe ve hemû agahî û nûçeyên derbarê çalakiyê de ‘qedexeya weşanê’ daye.
Militan RÊHAT