Hikumeta Colanî ya ku dixwaze li qada navneteweyî li hemberî QSD’ê “karta DAIŞ’ê” bigire destê xwe, di civîna bi Amerîkayê re ragihandibû ku ew beşdarî koalîsyona têkoşînê ya li dijî DAIŞ’ê bûne. Piştî vê yekê, serçeteyên DAIŞ’ê yên bi destê MÎT’ê li Sûriyê hatine organîzekirin, bi heyeta Istixbarata Giştî ya girêdayî HTŞ’ê re civiyan.
Li gorî agahiyên ku lekolin.org gihîştine, di 18’ê Mijdara 2025’an de, li çolistanên 90 km rojhilatê Palmîrayê (Tedmur), li herema Suxnê (Sukhne), civîneke veşartî ya asta bilind di navbera heyeta Ewlekariya Giştî ya girêdayî hikumeta Şamê, serçeteyên DAIŞ’ê û eşîra xwecihî ya Bedû de hate lidarxistin.
Di civînê de, hêzên Ewlekariya Giştî ya girêdayî HTŞ’ê ku bi talîmatên rasterast ên MÎT’ê tevdigerin, ji serçeteyên DAIŞ’ê xwestin ku li hemberî hebûna xwe ya li Sûriyê bidomînin û li seranserê Sûriyê, bi taybetî li herêmên Elewî, Dürzî û Kurdan bombebaran û êrişên terorê pêk bînin. Herwiha hate gotûbêj kirin ku çeteyên biyanî yên DAIŞ’ê yên wekî Ûygur, Çeçen û hwd. li rojavayê gundewarê Humusê û li nêzîkî sînorê Lubnanê, li herêma El-Qisêrê (tenê 15 km dûrî sînor) werin komkirin.
Hate fêhmkirin ku civîn bi rastî ji aliyê Fermandarê Lîwaya 74’an a girêdayî HTŞ’ê Amîd Cemîl el-Salih ve hatiye organîzekirin.
AVAHÎ Û NAVENDÊN LÎWAYA 74’AN
Piştî hilweşîna rejîma Beşar Esed di Kanûna 2024’an de, yek ji yekîneyên herî gengeş ên Artêşa Sûriyeya Nû ya girêdayî Wezareta Parastina Neteweyî ya Hikûmeta Demkî, Lîwaya 74’an (Firqet 74) ye ku ji HTŞ’ê derketiye û bi entegrasyona çeteyên biyanî tê naskirin. Di vê lîwayê de nêzî 2-3 hezar çete hene û ji sedî 60’ê wan ji çeteyên biyanî pêk tê. Lîwa hem di operasyonên ewlehiya navxweyî de hem jî di çalakiyên îstixbaratê yên derveyî sînor de roleke çalak dilîze.
Navenda sereke ya lîwayê li gundê Deyr Şimêl ê li ser riya Lazqiyê ya li bakur-rojavayê parêzgeha Hemayê ye. Deyr Şimêl wekî baregeha lojîstîk û perwerdeyê ya lîwayê kar dike.
Ev lîwa bi giranî ji çeteyên biyanî pêk tê: Ûygurên Rojhilatê Turkistanê, Çeçen, Ûygurên Çinî û çeteyên din ên bi eslê xwe Kafkasyayî, hin jî Tirkmen in. Li derdora bendava Deyr Şimêlê ji bo van çeteyên biyanî kampeke taybet heye.
Baregeha duyemîn a mezin jî li gundewarê Misyafê yê di navbera Hema û Humusê de, di avahiya ku berê serçeteyê Suhayl Hasan lê dimînin. Niha hate zanîn ku di vê avahiyê de serokên çeteyên DAIŞ’ê yên bi eslê xwe Urdunî têne komkirin.
Li gorî agahiyên ji çavkaniyên pêbawer, di heman rojê de yanî 18’ê Mijdarê, hinekan serokên çeteyên DAIŞ’ê yên payebilind bi rêyên taybet ji sînorên Urdun û Tirkiyeyê derbasî Sûriyê bûne û li herêmên di bin kontrola HTŞ’ê de ji bo civînê bi hikumeta Colanî re kom bûne.
SERDANA COLANÎ YA AMERÎKAYÊ DAIŞ XİST TEVGERÊ
Serdana dawî ya Colanî ya Amerîkayê û peymana “operasyonên hevbeş li dijî DAIŞ’ê” ya bi Washingtonê re, nîşan dide ku serçeteyên DAIŞ’ê ketine panîkê. DAIŞ difikire ku Colanî ji Amerîkayê ronahiya kesk wergirtiye da ku “hêmanên metirsîdar” di nav xwe de paqij bike. Ji ber vê yekê çeteyên DAIŞ’ê ji bo mane li jiyanê, bi lez li pey “agirbest û hevkarî” ya bi HTŞ’ê re ne. Heyeta girêdayî Istixbarata Giştî ya HTŞ’ê ku bi talîmatên MÎT’ê tevdigerin, vê rewşê dizane û dixuye ku dixwaze DAIŞ’ê wekî amûreke qirkirinê li gorî berjewendiyên xwe bi kar bîne.
