20 Şubat 2011 Pazar Saat 16:32
Komîteya Ziman û Perwerdeyê ya KCK’ê bi rasthatina salvegera 21’ê Sibatê, Roja Zimanê Dayîkê ya Cîhanê daxwiyaniyek da û got “Di heman demê de em bang li gelê me û hemû xwendekaran dikîn da ku tevlî banga TZPKurdî bibin û roja 21’ê Sibatê hemû dibistanan boykot bikin. Komîteyê bang li navnetewî UNESCO jî kir û xwest ji bo Kurdî bibe zimanê perwerdeyê divê bikeve nav hewldanan.
Komîteya Ziman û Perwerdeyê ya KCK’ê diyar kir ku divê gelê Kurd piştgirî bide biryara TZPKurdî û got “belê dewleta Tirk îro jî bi hukumeta AKP’ê siyaseta xwe ya înkar û tunekirinê bi awayekî hêj xapînok, hûr û kûrtir dide meşandin. Dema ku siyasetmedarên Kurd xwestin parastina xwe bi kurdî bikin, nehiştin û ji bo zimanê Kurdî gotin: zimanê nayê zanîn. Dema Kurd bi zimanê xwe perwerde xwestin, gotin: Ha ji we re qursên ziman, ma ne bes e. Komîteyê diyar kir ku divê bi dirûşima “Zimanê me hebûn û vîna me ye daxwaza ziman were bilindkirin.
Komîteyê got “Mirov, bi şoreşa ziman bû mirov û mirovahiya xwe pêşxist. Êdî bi pêşketina ziman û çandê re tevahî gelên cihanê bi zimanê xwe yên dayîkê bûn xwedî nasname. Li Hîlala Zêrîn(binarê Zagros û Torosan) bi çanda neolîtîkê zimanê Aryenan gelek pêş dikeve. Jixwe çanda neolîtîkî piştî li vir pêşdikeve, gav bi gav li hemû cîhanê belav dibe. Gelê Kurd jî yek ji wan gelan e ku çanda neolîtikê di asta herî jor de jiyan kiriye. Hûrî ku weke dapîr û bapîrên kurdan tên pejirnadin, di pêşketina mirovahiyê de roleke gelek girîng lîstine. Di heman demê de ji ber erdnigariya Kurdistanê, bûne xwedî dewlemendiyeke diyar. Ji ber vê dewlemendiya Kurdistanê, tu caran êrîş li ser Kurdan kêm nebûne. Gelek caran li ser gelê Kurd tevkujiyên mezin hatine kirin.
PEYMANA LOZANÊ PEYMANEK NAVNETEWÎ YE
Komîteya Ziman û Perwerdeyê ya KCK’ê ba kişand ser qirkirin û tevkujiya neteweya Kurd û got “Her çiqasî di dirokê de li ser gelê Kurd êrîş û tevkujî hatine kirin jî lê weke êrîş û tevkujiyên piştî peymana Lozanê rolekî xirab nelîstine. Peymana Lozanê, peymaneke navnetewî ye û projeyeke moderniteya Kapîtalîst a Ewrûpayê ye. Bi vê peymanê hem Kurdistan kirin çar parçe û hem jî piştgiriya siyaseta înkar û tunekirinê heta dawî kirin. Bêguman her dewleteke dagirker ev siyaset bi awayekî cuda meşandiye.
Komîteyê diyar kir ku Saddam heta ku têk çû jî bi kîmyabaranan, înfalan tevkujiyeke gelek mezin li ser gelê Kurd dimeşand û got “ Bêguman ev hemû jî li ber çavên cîhanê dikirin û herkesî li vê hovîtiyê temaşa dikir.
Daxwiyaniya Komîteya Ziman û Perwerdeyê ya KCK’ê wiha didome:
Dewleta Sûryê bi şewitandina sinemaya Amûdê, kembera Ereb, tevkujiya Qamişloyê ya 12’ê Adarê re ev siyaset dimeşand. Heta di destûra bingehîn a Suryê de hê jî gelê Kurd weke netewe nayê naskirin.
Dewleta Îranê bi darvekirina Qazî Mihamed, kuştina Qasimlo û darvekirinên endamên PJAK’ê re xwest îradeya gelê Kurd teslîm werbigre. Hê jî vê siyasetê dimeşîne. Herî dawî dema gelê Kurd daxwaza perwerdeya bi Kurdî kir, bi darvekirina hevalê Hêmin(Hisnî Xizirê) bersivek da. Bi vê xwest vê peyamê bide: Dema hûn daxwaza perwerdeya bi Kurdî bikin, emê we darvebikin.
ÎNKAR Û TUNEKIRIN DI ASTA JOR DE TÊ MEŞANDIN
Komîteyê bal kişand ku siyaseta înkar û tûnekirinê di asta herî jor de, ji aliyê dewleta Tirk ve tê meşandin û wiha domand “Dewleta Tirk pişaftineke wisa meşand ku êdî gihîşt asta xwepişaftinê. Jixwe destpêkê bi awayekî eşkere hebûna Kurdan û zimanê Kurdan înkar kir û ji Kurdan re got: Tu tune yî, ji xwe gelê ku tunebe zimanê î jî tune ye. Heta ew siyaset anîn astek wisa ku wekî qedera gelê kurd bi gelê me dane bawerkirin. Gelê me jî êdî serê xwe li ber qederê tewandibû û hêdî hedî diheliya. Ji ber vê yekê jî zimanê Kurdî êdî ji nava refên zimanên zindî derdiket û bi lez û bez ber bi mirin û zimanên mirî ve diçû. Lê bi têkoşîna Tevgera Azadiyê re, ev hate berovajîkirin. Lê belê dewleta Tirk îro jî bi hukumeta AKP’ê siyaseta xwe ya înkar û tunekirinê bi awayekî hêj xapînok, hûr û kûrtir dide meşandin. Dema ku siyasetmedarên Kurd xwestin parastina xwe bi kurdî bikin, nehiştin û ji bo zimanê Kurdî gotin: zimanê nayê zanîn. Dema Kurd bi zimanê xwe perwerde xwestin, gotin: Ha ji we re qursên ziman, ma ne bes e.
Komîteya Ziman û Perwerdeyê ya KCK’ê wiha berdewam kir:
“Yanê bi kurtasî hê jî li ser zimanê Kurdî qedexe didomin. Jixwe heta zimanê Kurdî bi awayekî fermî nebe zimanê perwerdehiyê dê cihê xwe di nava cîhana zimanên gerdûnê de negire. Ji ber vê jî gelê Kurd êdî gihiştiye wê zanebûnê ku êdî pergala xwe perwerdeyê bixwe avabike. Jixwe di pratîkê de gav bi gav vê yekê pêktîne. Çalekiyên ji bo jiyana duzimanî gavavêtina avakirina pergala xwe ye.
Divê dewletên dagirker û pergala modernîteya kapîtalîst guh bide daxwazên gelê Kurd ên xwezayî. Gelê Kurd tiştekî zêde naxwaze. Tenê dixwaze weke her gelekî li cîhanê bi zimanê xwe perwerde bibîne, li gorî çanda xwe azad bijî. Di vir de eger dewletên dagirker dixwazin bi gelê Kurd re aş bibin û di navava aşitîyekî de bijîn, divê berî her tiştî dev ji siyaseta xwe ya înkar û tunekirinê berdin û astengiyên di pêşiya ziman û çanda Kurdî de jî ji holê rakin. Eger pergala modernîteya kapîtalîst jî dixwaze li hemberî Kurdan xwe paqij derxe, divê berovajî peymana Lozanê tevbigere û ji bo gelê Kurd bighe mafên xwe yên xwezayî bikeve nava liv û tevgerê. Jixwe li gorî peymanên wan bi zimanê dayikê perwerde dîtin, mafê herî xwezayî ye. Lê heta niha ne li gorî qanûn û peymanên xwe li gorî berjewendiyên xwe nêzîkî gelê Kurd dibin.
ZIMANÊ ME HEBÛN Û VÎNA ME YE
Gelê Kurd gihiştiye wê bawerî û zanebûnê ku êdî dê ji dewletên dakirker û pergala modernîteya kapîtalîst tu hêvî û bendewariyan neke. Dê di nava xweseriya demokratik de pergala xwe ya ziman û perwerdeyê bi hêza xwe avabike. Em bang li gelê xwe dikin ku têkoşîna xwe bi durişmeya : Zimanê me hebûn û vîna me ye. bilind bikin û pergala xwe ya ziman û perwerdehiyê ava bikin. Ji bo bilindkirina vê têkoşînê em bang li jin, ciwan û rewşenbîrên kurd dikin da ku rolên xwe yên pêşengtiyê bilîzin. Di heman demê de em bang li gelê me û hemû xwendekaran dikîn da ku tevlî banga TZPKurdî bibin û roja 21’ê Sibatê hemû dibistanan boykot bikin
DIVÊ UNESCO BIKEVE NAVA HEWLDANAN
Komîteya Ziman û Perwerdeyê ya KCK’ê bang li rêxistina navnetewî UNESCO jî kir û got “Her wisa em bang li UNESCO dikin da ku bi boneya Roja Zimanê Dayîkê, guh bide daxwazên gelê Kurd û ji bo zimanê Kurdî bibe zimanê perwerdeyê bikeve nava hewldanan û bi vî awayî li pişt bîryara xwe bisekine.
Navenda Lêkolînên Stratejîk a Kurdistanê
www.navendalekolin.com www.lekolin.org -www.lekolin.net – www.lekolin.info
