Hevpeymaniya Hêzên Siyasî yên Rojhilatê Kurdistanê derbarê geşedanên dawî de daxuyaniyek nivîskî weşand. Di daxuyaniyê de peyamek di serî de ji bo hemû gel û azadîxwazên li Îranê, her wiha ji bo gelê tirkî yê Azerbaycanê û welatên cîran hat şandin.
Hevpeymaniya Hêzên Siyasî yên Rojhilatê, di vê qonaxa hesas a têkoşînê de, li ser bingeha dîroka neteweyî û demokratîk a tevgera neteweyî û demokratîk a Kurdistanê û prensîbên têkoşînê, û bi hişmendiya berpirsiyariya xwe ya dîrokî di şert û mercên heyî yên Îranê de, careke din girîngiya hevgirtin û yekîtiya di navbera hemû hêzên azadîxwaz û gelên bindest ên welêt de radixe ber çavan. Armanc, derbasbûna ji despotîzmê ( rêveberiya otorîter) û avakirina pêşerojeke demokratîk e. Em bawer dikin ku pêşerojeke mayînde ya Îranê tenê bi damezrandina sîstemeke demokratîk a ku mafên neteweyî yên neteweyan tê de bên naskirin, li ser bingeha edalet û wekheviyê be û azadiyên bingehîn ên hemwelatiyan bên garantîkirin, mimkun e. Hevpeymaniya Hêzên Siyasî yên Kurdistanê ya Îranê, di vê çarçoveyê de ji bo avakirina Îraneke azad, demokratîk û pirreng, amadebûna xwe ya ji bo hevkarî û xebata hevpar bi hemû hêzên siyasî û sivîl ên demokrasîxwaz re ragihand.
BANGEK JI BO TIRKÊN LI AZERBAYCANÊ
Birayên me yê Azerî! Em wek rastiyeke dîrokî dizanin ku li hin bajar û herêman, bi taybetî li Azerbaycan û Kurdistanê, Azerî û Kurd bi sedsalan li kêleka hev jiyane. Pêşeroja van herêman divê li ser bingeha hevkarî, rêveberiya hevpar û garantîkirina mafên wekhev ên hemû civakan were şekildan. Di van herêmên bi nifûsa tevlihev de, Hevpeymaniya Hêzên Siyasî yên Rojhilatê piştgiriya damezrandina mekanîzmayên rêveberiya herêmî yên hevpar dike ku avahiya nifûsa herêmî û îradeya gel nîşan bide. Hevpeymaniyê bawer dike ku ewlehî û aramiya mayînde tenê bi hebûna hemû gelên herêmê — li Azerbaycan, Kurdistan û herêmên din ên ku Kurd û Tirk lê dijîn — mafên siyasî, çandî û zimanî yên wekhev, û rêveberiya herêmî bi saziyên demokratîk û hesabpirsînbar ve were rêvebirin, mimkun e. Her tim mîna berê em destê hevkarî û diyalogê dirêjî gelê Azerbaycanê yê Türk û hêzên wan ên siyasî dikin û amade ne ku ji bo diyalog, hevrêzî û li herêmên hevpar mekanîzmayên ku ewlehiya giştî û aramiyê peyda bikin, bixebitin. Pêşeroja herêmê divê li ser bingeha jiyana hevbeş, rêzên hevûdu û beşdariya wekhev a hemû gelan were avakirin. Herwiha em bi balkişandina li ser têkiliyên dîrokî û girêdanên civakî yên di navbera gelê Kurd û gelê Azerbaycanê yê Tirk de, bawer dikin ku pêşeroja têkiliyên van her du gelan divê li ser bingeha diyalog, rêzên hevûdu û jiyana hevbeş a aştiyane were avakirin. Di vê çarçoveyê de, em careke din dilsoziya xwe bi giyan û bendên Peymana Dostaniyê ya di navbera Komara Kurdistanê û Hikûmeta Neteweyî ya Azerbaycanê de dubare dikin û vê yekê wek sembolek û nexşerêya hevkarî û têgihiştinê di navbera tevgerên demokratîk ên Kurdistan û Azerbaycanê de dibînin.
Hevpeymaniya Hêzên Siyasî yên Kurdistanê ya Îranê, di rêya xwe de berdewam dike ku xurtkirina hevkarî di navbera hêzên demokrasîxwaz de, pêşxistina diyaloga di navbera neteweyan de û damezrandina mekanîzmayên hevpar ên ji bo jiyana hevbeş a edaletî, wek hêmanên bingehîn ên gihîştina pêşerojeke azad û edaletî ji bo hemû gelên Îranê dibîne û her cure hevkarî û hewldanên di vê rêyê de bi dilxweşî pêşwazî dike.Di derbarê têkiliyên bi gel û welatên cîran de jî, Hevpeymaniya Hêzên Siyasî yên Kurdistanê ya Îranê; jiyana hevbeş a di aştiyê de, cîranîya baş û rêzgirtina berjewendiyên rewa û hevbeş ên hemû welatên herêmê radixe ber çavan û bawer dike ku aşti û aramiya herêmî tenê bi rêya diyalog, hevkarî û rêzên hevûdu di navbera gel û dewletan de dikare were xurtkirin.
